Tha Ministreachd an Dìon air ainmeachadh an-diugh, air Là AIDS na Cruinne, gun tog iad an casg a th’ air daoine le HIV bho seirbheis san arm.
Tha Ministreachd an Dìon air ainmeachadh an-diugh, air Là AIDS na Cruinne, gun tog iad an casg a th’ air daoine le HIV bho seirbheis san arm.
Bho chionn 1985 tha casg air a bhith air daoine le HIV bho seirbheis san arm air sgàth ’s gu bheil am Ministreachd ag ràdh nach eil iad “fiot gu leòr”.
Tha cuideachd casg air daoine a bhios a’ gabhail chungaidhean-leigheis a leithid PrEP (Leigheas ro-chasgach ro-ghabhalach) gus an dìon fhèin bho HIV fhaighinn air sgàth ’s gu bheil cungaidhean-leighis riaghailteach na dùbhlan logastachd air an arm.
Thathar an dùil gun tèid an casg a thogail as t-earrach.
Nochd an sgeulachd seo air a’ Ghèidheal Ùr o thùs.
Tha Riaghaltas na h-Alba air ainmeachadh gun deach sia cùisean de dh’Omicron a dhearbhadh an Alba.
Tha 4 cùisean ann an Siorrachd Lannraig agus dà chùis ann an sgìre Ghlaschu is Chluaidh.
Tha Rùnaire Stàite na Slàinte is a’ Chùraim Shòisealta, Sajid Javid, air ainmeachadh gu bheil dà chùis de dh’Omicron, an srèana ùr de Chovid-19 a thig à Afraga a Deas, air nochdadh san Rìoghachd Aonaichte.
Chaidh aon chùis a dhearbhadh ann an Chelmsford agus tè eile ann an Nottingham.
Tha na pearsachan agus na teaghlaichean aca a-nis gan cumail fhèin air leth.
Tha Roinn na Slàinte air ràdh gu bheil an dà chùis co-cheangailte ri chèile agus ri siubhal ann an Afraga a Deas.
Tha Oifis na Sìde a’ sgaoileadh rabhadh orainds airson ceann a tuath agus taobh sear na h-Alba ’s iad ag ràdh gu bheil dùil ri gaoith suas ri 75m.s.u bho thuath no an iar-thuath ann an cuid de sgìrean.
Tha an rabhadh an-sàs bho 3:00 feasgar Dihaoine gu 9:00 madainn Disathairne.
Tha iad cuideachd a’ sgaoileadh rabhadh buidhe airson gaoithe anns a’ chòrr de dh’Alba agus rabhadh buidhe airson sneachda mu thuath.
Tha Poileas Alba a’ sireadh fiosrachaidh as dèidh mar a dh’fhulaing boireannach, 35, ionnsaigh dhrabasta an Inbhir Nis.
Thachair an ionnsaigh mu 2:15m Diciadain air Brown Street.
Thuirt an Detective Sàirdseant Crìsdean MacLeòid nach deach am boireannach a ghoirteachadh.
Tha na poilis airson bruidhinn ri fireannach a tha timcheall air 40 bliadhna a dh’aois, mu 5tr 8or a dh’àirde, caol le falt donn goirid.
Bha seacaid no geansaidh dorcha agus briogais soilleir air.
Tha iad ag iarraidh air neach sam bith aig a bheil fiosrachadh fios a chur thuca air 101 a’ toirt seachad an àireamh 0208 airson an 24mh latha dhen t-Samhain.
Thèid neach-amharais mu choinneamh diùraidh san Fhaoilleach fo chasaid oidhirp fireannach a mhurt le bhith ga bhualadh air a cheann le àmhainn meanbh-thonn.
Thathar ag aithris gun tug William Williamson ionnsaigh air Gary Paterson ann am flat an Inbhir Nis sa Mhàrt am-bliadhna.
Tha luchd-casaid ag ràdh gun deach dòrn a thoirt dha Mgr Paterson uair is uair, chaidh a bhìdeadh air a chluas, a bhualadh le bàr meatailteach agus a bhualadh air a cheann le àmhainn meanbh-thonn.
Tha Mgr Williamson cuideachd fo chasaid baga a ghoid bho Mgr Paterson.
Tha NHS nan Eilean Siar air dàil a chur air cuid de dh’obair-lannsa agus coinneamhan dotair mar thoradh an cuideam a tha coròna-bhìoras a chur air na seirbheisean aca.
Thuirt am bòrd gum feum iad prìomhachas a thoirt dha na h-euslaintich as motha a tha feumach air cùram èiginneach is iad ag iarraidh air daoine gun a dhol gu ionadan tubaiste is èiginn ach ma tha am beatha ann an cunnart.
Thèid fios a chur gu euslaintich air a bheil seo a’ toirt buaidh.
Thuirt Àrd-oifigear a’ bhùird, Gòrdan Jamieson, gur e co-dhùnadh doirbh a bha seo agus gun tèid ath-sgrùdadh a dhèanamh air an suidheachadh gach seachdain.
Chaidh càin de trì ceud not agus casg dràibhidh fad trì mìosan a chur air fireannach as dèidh dha siubhal aig 116msu air an A9.
Chaidh Szymon Kryszczyszyn, 21, à Inbhir Pheofharain, a ghlacadh leis a’ Phoilis faisg aig Arpa Philidh faisg air Cearcall-rathaid an Todhair san Dàmhair 2019.
Tha britheamh air co-dhùnadh gu bheil Uilleam MacDhùghaill fiot gu leòr airson dol gu cùirt fo chasaid moirt Renee NicRath agus a balach òg, Anndra, bho chionn 45 bliadhna.
Cha deach na cuirp aca a lorg a-riamh.
Bha dragh ann nach biodh Mgr MacDhùghaill, 80, fiot gu leòr as dèidh dha amhaich a leòn aig an dhachaigh bho chionn ghoirid.
Ach tha co-dhùnadh a’ bhritheimh a’ ciallachadh gun tèid a’ chùis mu choinneamh diùraidh san Àrd-chùirt ann an Inbhir Nis san t-Sultain an ath-bhliadhna.
Dh’ainmich am Prìomh Mhinistear, Nicola Sturgeon, nach tèid sgeama nan teisteanas banachdaich a leudachadh ann an Alba agus gum bidh Albannaich comasach air ionadan agus tachartasan a frithealadh le bhith a’ sealltainn toradh deuchainne lateral flow àicheil.
Bidh feum fhathast air teisteanas banachdaich a shealltainn aig toglaichean fo cheadachd aig a bheil làr-dannsa; tachartasan a-staigh gun suidheachanan far a bhios còrr ‘s 500 an làthair; tachartasan a-muigh gun suidheachanan far a bhios còrr ‘s 4,000 an làthair; agus tachartasan sam bith far a bhios còrr ‘s 10,000 an làthair.
Tòisichidh an sgeama ùr air an 6mh latha dhen Dùbhlachd.
Tha na Poilis an Inbhir Nis a’ sireadh fiosrachaidh as dèidh dà thachartas oidhche Shathairne a dh’fhaodadh a bhith ceangailte.
Chaidh na Poilis a ghairm gu aimhreit ann am Beaufort Gardens anns a’ Mhanachainn mu 7.45f anns an robh grunn dhaoine an-sàs.
Chaidh fireannach, 38, a thoirt a dh’Ospadal an Rathaig Mhòir an Inbhir Nis is e air a dhroch ghoirteachadh le carbad.
Tha na Poilis dhen bheachd gu bheil an tachartas anns a’ Mhanachainn ceangailte ri chàr a chaidh dhan Chanàl Chailleanach an Inbhir Nis mu 8.55f air an aon oidhche.
Thuirt iad gun deach an càr a thogail às a’ chanàl Didòmhnaich agus nach robh duine sam bith na bhroinn.
Bu chòir do dhuine sam bith le fiosrachadh mu na thachair fòn a chur gu 101 a’ toirt seachad an àireamh 3031 airson an 2mh latha dhen Dàmhair.
Tha Poileas Alba a’ sireadh fiosrachaidh mu Ross McQuade a tha a dhìth à Ceann a’ Ghiùthsaich.
Chan fhacar bho Mgr McQuade bho 9f Didòmhnaich.
Tha e 6’2″ a dh’àirde is tha falt dhonn ghoirid agus bun feusaig air.
Thathar a’ creidsinn gu bheil dìnichean ghorm, hoodie dhorcha agus bòtainnean no brògan-trèanaidh dhubh is pinc air.
Bu chòir do dhuine sam bhith le fiosrachadh mu a dheidhinn fòn a chur gu 101 a’ toirt seachad an àireamh 0093 airson an 4mh latha dhen Dàmhair.