Muinntir na h-Eilbheise air bhòtadh airson pòsadh aon-sheòrsach

26 An t-Sultain 2021

Tha cha mhòr dà thrian de luchd-bhòtaidh anns an Eilbheis air bhòtadh airson pòsadh aon-sheòrsach a dhèanamh laghail san dùthaich.

Bhòt 64.1 sa cheud de luchd-bhòtaidh agus a h-uile gin de na 26 cantonaichean (sgìrean) air a shon.

A bharrachd air pòsadh aon-sheòrsach, tha e a’ ciallachadh gum faod càraidean aon-sheòrsach clann uchd-mhacachadh agus gum faigh boireannaich chùeire cothrom air leigheas torrachais.

• • •

Alba air curaicealam a ghabhas a-steach cùisean LGDT+ a thoirt a-steach

26 An t-Sultain 2021

‘S e Alba a’ chiad dùthaich san t-saoghal gus curraicealam a ghabhas a-steach cùisean leasbach, gèidh, dà-sheòrsach is tar-ghnèitheach a thoirt a-steach.

Gheibh luchd-teagaisg cothrom air e-trèanadh aire a-thaobh cùisean LGDT+ agus pasgan de ghoireasan teagaisg in-ghabhalach air an làrach-lìn ùr http://lgbteducation.scot.

Bidh cuspairean do gach buidhean-aoise a-nis a’ toirt a-steach dearbhan-aithne, cùisean agus eachdraidh LGDT+ ann an oidhirp gus co-ionannachd a bhrosnachadh agus burraidheachd a lughdachadh.

Thèid làrach-lìn a chur air bhog cuideachd le goireasan agus fiosrachadh do dhaoine òga.

• • •

Fear a dhìth às an Eilean Dubh

22 An t-Sultain 2021

Tha Poileas Alba a’ sireadh fiosrachaidh mu Dean Lockhart, 36, a tha a dhìth à sgìre Pholl Lòchaidh air an Eilean Dubh.

Chan fhacar bho Mhgr Lockhart bho 9.30m Dimàirt.

Tha e mu 5’ 10” de dh’àirde, caol, ‘s falt dhorcha agus feusag dhonn ghoirid air.

Bu chòir do neach sam bith le fiosrachadh mu a dheidhinn fòn a chur gu 101 a’ toirt seachad àireamh PS-20210921-3305.

• • •

Saighdearan gan toirt a-steach gus ambaileansan a dhràibheadh

22 An t-Sultain 2021

Chaidh ainmeachadh an-diugh gun tòisich saighdearan a’ dràibheadh ambaileansan dha Seirbheis Ambaileans na h-Alba Disathairne.

Dhearbh Ministreachd an Dìon gum bidh iad a’ solarachadh 114 dràibhear agus 111 neach-obrach a bharrachd a bhios ag obair ann an ionadan-deuchainn Chovid.

A bharrachd air sin, tha Rùnaire na Slàinte, Humza Yousaf, air ainmeachadh gun tig barrachd thaic bhon t-seirbheis-smàlaidh agus gun tèid £20m a bharrachd de mhaoineachadh a thoirt dhan t-seirbheis-ambaileans.

• • •

Banachdach do chlann aois 12 gu 15

15 An t-Sultain 2021

Chaidh a dhearbhadh gun tòisich clann an Alba eadar 12 agus 15 bliadhna de dh’aois banachdach dhan choròna-bhìoras fhaighinn Diluain.

Seo an dèidh do dh’oifigearan meadaigeach na Rìoghachd Aonaichte a’ chomhairle aca air a’ chùis atharrachadh Diluain.

Bidh banachdaichean rim faotainn aig ionadan-tadhail an toiseach, ach thèid litrichean a chur a-mach dhan a h-uile duine a tha anns a’ bhuidhinn-aoise seo is iarraidh orra tighinn gu coinneamh.

• • •

722 bàs le drugaichean an Alba sa chiad leth de 2021

14 An t-Sultain 2021

Tha figearan ùra bho Riaghaltas na h-Alba a’ sealltainn gun robh 722 bàs an Alba sa chiad leth de 2021 is amharas ann gun robh iad ceangailte ri drugaichean.

Tha sin 9 bàs (1%) nas lugha na an aon àm an-uiridh.

Bha a’ chuid mhòr de bhàis ann am mòr-sgìre Ghlaschu (187), Siorrachd Lannraig (67), Dùn Èideann (64) agus Taobh Tatha (64).

Bha 69% dhiubh nam fireannaich eadar 34 is 54 bliadhna a dh’ aois agus chaochail 35 a bha nas òige na 25.

Thuirt Angela Constance, Ministear Poileasaidh nan Drugaichean, gu bheil na figearan seo uabhasach uair eile ach gu bheil “iad [an Riaghaltas] a’ dèanamh farsainneachd de rudan ann an oidhirp dèiligeadh ris an èiginn slàinte phoblaich a tha seo”.

• • •

Ath-chuinge mu charbadan siubhal aig astar air slighe an NC500

14 An t-Sultain 2021

Tha boireannach à Liabost air taobh sear Ghallaibh air ath-chuinge mu charbadan siubhal aig astar air slighe an NC500 a thòiseachadh is còrr air 400 air an ainmean a chur rithe thuige seo.

Bhàsaich cat Raonaid Smart nuair a chaidh a bhualadh le càr is tha dragh oirre a-nis gum faodadh cuideigin a bhith air a ghoirteachadh.

Faodar an ath-chuinge a lorg aig: [http://www.change.org/p/highland-council-stop-vehicles-speeding-through-villages-on-the-nc500-route](http://www.change.org/p/highland-council-stop-vehicles-speeding-through-villages-on-the-nc500-route).

• • •

Fireannach le stuthan-spreadhaidh an greim an Inbhir Nis

13 An t-Sultain 2021

Chaidh fireannach, 51, a chur an greim Disathairne is a’ Phoilis ag ràdh gun deach a lorg le stuthan-spreadhaidh aig taigh ann am Marc-innis an Inbhir Nis.

Thathar an dùil gun nochd e aig Cùirt an t-Siorraim ann an Inbhir Nis an-diugh.

• • •

Emma Roddick ga suidheachadh mar cho-neach-gairm buidheann LGDT+ Taigh an Ròid

08 An t-Sultain 2021

Chaidh Emma Roddick BPA a shuidheachadh mar cho-neach-gairm buidheann thar-phàrtaidh LGDT+ Taigh an Ròid.

Is e ceann-uidhe a’ bhuidhinn cùisean a tha cudromach don choimhearsnachd LGDT+ an Alba a dheasbad agus a bhrosnachadh gus am beathannan a dhèanamh nas fheàrr.

Is i Roddick a’ chiad BPA LGDT+ airson na Gàidhealtachd ’s nan Eilean.

Bidh i ag obair còmhla ris a’ BhPA Tòraidheach Jamie Greene san dreuchd.

**[^1] Nochd [an t-artaigil seo air Geidh.uk](https://geidh.uk/2021/09/08/emma-roddick-ga-suidheachadh-mar-cho-neach-gairm-buidheann-lgdt-taigh-an-roid/) bho thùs.**

• • •

Prògram ùr an Riaghaltais

07 An t-Sultain 2021

Tha am Prìomh Mhinistear, Nicola Sturgeon, an-diugh air prìomh amasan an Riaghaltais airson na bliadhna air thoiseach a mhìneachadh.

’S iad:

* ath-leasachaidhean air seirbheisean cùraim a thoirt gu buil agus co-dhiù £800m a bharrachd a chosg air seirbheisean cùraim thar beatha na Pàrlamaid;

* cùraim-chloinne a thabhann ro sgoile, as dèidh na sgoile agus rè na saor-làithean;

* maoineachadh a bharrachd do sheirbheisean slàinte agus seirbheisean slàinte-inntinn duine ri duine;

* ath-leasachadh a dhèanamh air laghan aithneachadh gnè;

* mathanas a thoirt do mhèinneadairean a chaidh a dhìteadh anns na 1980an airson dol air stailc;

* riaghailtean cleasan-teine a’ neartachadh;

* reifreann a chumail air neo-eisimeileachd na h-Alba ro deireadh 2023.

• • •

Ionadan ath-chuairteachaidh ri dùnadh rè ùine airson obair-ghlèidhidh riatanach

06 An t-Sultain 2021

Tha Comhairle na Gàidhealtachd air ainmeachadh gun tèid dà ionad ath-chuairteachaidh aca a dhùnadh an t-seachdain seo airson obair-ghlèidhidh riatanach.

Bidh ionad ath-chuairteachaidh Inbhir Pheofharain dùinte 8mh latha den t-Sultain eadar 10m ⁊ 2f.

Bidh ionad ath-chuairteachaidh Inbhir Narainn dùinte 9mh latha den t-Sultain eadar 10m ⁊ 2f.

Dhearbh a’ Chomhairle nach ghabh àite a ghleidheadh airson bhanaichean no trèilearan rè an ùine seo is thug iad leisgeul airson a’ bhuaireadh.

• • •

Dùil gun ainmich Boris Johnson caibineat ùr

06 An t-Sultain 2021

Tha aithrisean ann gum faodadh Boris Johnson sgioba ministreil ùr ainmeachadh Diardaoin.

Tha fathannan ann gum faigh Rùnaire nan Dùthchannan Cèin, Dominic Raab, agus Rùnaire an Fhoghlaim, Gavin Williamson, dreuchdan ùra mar phàirt den atharrachadh.

• • •